Бесплатна медицинска нега за 90 пензионери од Центар

Деведесет пензионери од општина Центар ќе добијат бесплатна медицинска нега и помош со проектот „Центар се грижи за возрасните“ чие продолжение општината го најавува за следниот месец. Заинтересираните пензионери-жители на Центар за вклучување во проектот од петок (23 март) ќе можат да достават апликација и документи во општинската архива.

Апликантите, или нивни блиски, треба да поднесат фото-копиии од лична карта, од потврда за пензија и од медицински документ за здравствена состојба. Пријавите ќе ги разгледува стручна комисија, која при изборот ќе води сметка за социјалниот статус, финансиската и здравствената состојба на лицето кое аплицира за помош.

– Оние граѓани кои ќе добијат вакви субвенции, како и досега, првично ги посетува социјален работник, кој ги нотира нивните потреби од медицинска нега. Потоа, земајќи ги предвид индивидуалните потреби на секој граѓанин, се одредуваат бесплатните услуги и помош која треба да му се пружи на секој корисник одделно, соопшти општина Центар.

Лиценцирани негуватели ќе ги посетуваат лицата три пати неделно. Оваа година е предвиден поголем буџет за проектот и на барање на граѓаните, возрасните лица на располагање ќе имаат и физиотерапевт, медицинска сестра и психолог во зависност од потребите на корисниците, најави општината.