Идната недела почнува преселбата на деца од заводот во Демир Капија во мали групни домови
Овој месец, вкупно седум деца од Специјалниот завод Демир Капија ќе бидат преместени во мали групни домови во кои ќе им бидат обезбедени сите услови и услуги за успешен раст и развој. Првите корисници што ќе излезат во понеделник се селат во мал групен дом во Неготино.
Министерката за труд и социјална политика Мила Царовска, со дел од пратениците го посети Специјалниот завод Демир Капија, каде што реформите интензивно течат.
– Ова е првиот чекор кон градење похумано општество. Деинституционализацијата е премин од социјална грижа во големи „безлични“ институции кон грижа во заедницата. Со ова овозможуваме развој на социјални услуги по мерка на граѓаните и можност за активно учество на згрижените лица во животот во заедницата. Деинституционализацијата е процес што декларативно се спроведува веќе дваесетина години, но досегашните постигнувања беа скромни, се вели во денешното соопштение од Министерството за труд и социјална политика.
Министерството, се додава во соопштението, се заложи до 2020 година да нема ниту едно дете на возаст до три години во институциите и продолжува посветено да работи во таа насока.