Епидемиолозите предупредуваат: Наглото затоплување носи ризик од заразни заболувања!
Наглото затоплување носи опасност од сериозни заболувања. Министерството за здравство излезе со препораки да се внимава при излегувањето надвор и да се избегнува директна изложеност на сонце.
-Се препорачува граѓаните да бидат внимателни, имајќи предвид дека изложеноста на повисоки температури, без претходна постепена адаптација, создава чувство на поинтензивна топлина слична на онаа во летните месеци и може да предизвика здравствени проблеми кај некои лица. Воедно, се препорачува хронично болните лица редовно да ја земаат пропишаната терапија, соопшти Министерството за здравство.
Според епидемиолозите топлото и влажно време овој период од годината носи ризици и за заразни заболувања.
-Заразни заболувања кои се пренесуваат преку вектори, под вектори подразбираме крлежи, комарци и други инсектти кои се хранат со крв. Животните обично се резервоари на овие заболувања, а човекот е случаен или краен домаќин на овие заболувања, изјави д-р Александар Миќиќ, епидемиолог во ИЈЗ.
Токму комарците и крлежите можат да пренесат сериозни болести.
-Како што се западно нилската треска, која лани беше регистрирана и во Македонија и маларија кое е сериозно заболување, за среќа не е редистрирана подолго време кај нас, додаде д-р Миќиќ.
Епидемиолозите потенцираат дека превенцијата е најдобра заштита. Освен личните мерки неопходна е и дезинсекција што е законска обврска на сите Општини.
Годинава прскањето против комарци е пролонгирано, за разлика од лани кога првото уништување на ларвите се реализираше на почетокот на април. Од Град Скопје уверуваат дека дезинсекцијата не е поради одложувањето на локалните избори, туку причина биле ниските утрински температури. Најавија авионско прскање за наредната недела.