Дваесет и пет табли на македонски, албански и англиски јазик се поставени пред јавните здравствени установи во кругот на Клиничкиот центар „Мајка Тереза“ во Скопје. Тие ќе служат како показатели за клиниките со цел пациентите полесно да се снаоѓаат во кругот на Клиничкиот центар.
Министерот за здравство Арбен Таравари денеска во кругот на Клиничкиот центар изјави дека потпишал барање до Јавната установа од областа на здравството за потребите на ЈЗУ Универзитетски клиники, Завод и Ургентен центар-Скопје, за поставување табли и 16 канти за отпад, а во втората фаза ќе биде поставено ново осветлување.
– Во Клиничкиот центар се даваат најголемите здравствени услуги и заслужува да изгледа многу подобро. Пред некое време заедно со Јавната установа од областа на здравството за потребите на ЈЗУ Универзитетски клиники, Завод и Ургентен центар-Скопје спроведовме акција за чистење во просторот околу Клиничкиот центар. Разлислуваме да го решиме и просторот за паркирање, посочи Таравари.
Директорката на Јавната установа од областа на здравството за потребите на ЈЗУ Универзитетски клиники, Завод и Ургентен центар-Скопје, Шкодране Дардишта рече дека поставувањето на таблите во кругот на Клиничкиот центар е голем чекор за пациентите, односно населението од албанската припадност и за пациентите кои доаѓаат од Косово и од Албанија.
– Триесет отсто од пациенти кои бараат здравствени услуги во Клиничкиот центар се Албанци и сега ќе им биде полесно да се снајдат во кругот на Клиничкиот центар. Ова произлезе од соработката меѓу ЈЗУ Универзитетски клиники, Завод и Ургентен центар-Скопје заедно со Министерството за здравство, потенцира Дардишта.
Одговарајќи на новинарско прашање таа рече дека 500.000 денари чини целиот проект. – Претходно имаше 12 патокази, сега има 25 патокази, четири легенди, главна мапа и табла на главниот влез на Клиничкиот центар, рече Дардишта.