Во СТУДИЈА објавена во списанието Frontiers in Nutrition, истражувачите спровеле мета-анализа (статистичка анализа која ги споредува резултатите од постоечките студии на оваа тема) на девет претходни статии. Со споредување на придржувањето на учесниците до ризикот од белодробни заболувања, истражувачите заклучиле дека колку подобро луѓето се придржуваат до принципите на медитеранската исхрана, толку е помала веројатноста да добијат рак на белите дробови.
Познато е дека медитеранската исхрана има добар ефект врз здравјето на коските, когнитивната функција и кардиоваскуларното здравје. Се споменува и дека го забавува стареењето, меѓу другите ветувачки научни откритија.
„Иако повеќе студии, особено оние кои вклучуваат учесници од многу различни делови на светот, би биле корисни за подобро разбирање на овие наоди, оваа студија е охрабрувачка“, изјавил диететичарот Вандана Шет за Eat This, Not That. „Храната може да има силно и позитивно влијание врз унапредувањето на здравјето и превенцијата од болести. Редовното уживање во медитеранската исхрана може да биде дел од вашиот арсенал за борба и намалување на ризикот од некои видови на рак“.
Оваа конкретна студија се занимавала со корелација, а не со причинители
Само затоа што луѓето кои ја следеле диетата имале помали шанси да заболат од болеста, не значи дека самата диета ги спречува луѓето да се разболат. Сепак, истражувачите заклучиле дека е можно придржувањето кон медитеранската исхрана да биде заштитен фактор.
Секако, оваа исхрана вклучува многу хранливи намирници и може да придонесе за целокупното здравје. „Храната што вообичаено се консумира во медитеранската исхрана е богата со хранливи материи, вклучувајќи маслиново масло, зеленчук, овошје, цели зрна, мешунки, јатки и семки, како и риба и морски плодови“, вели диететичарот Џули Ендрјус.
„Оваа храна содржи хранливи материи кои се здрави за целото тело, како што се омега 3 масни киселини, влакна, витамини, минерали и антиоксиданси. Не е изненадувачки да се видат податоци кои покажуваат дека медитеранската исхрана исто така може да помогне во одржувањето на здравјето на белите дробови, срцето и мозокот“, објаснила Ендрјус.