Крај на агонијата на пациенти со секундарна пулмонална хипертензија – Нема да умираат чекајќи лекови!!
Ревидирање на позитивната листа со додавање на лекови за пулмонална хипертензија за пациенти да не умираат бидејќи оваа болест им била секундарна и не ги следувала терапија на државна сметка. Ова го ветил министерот за здравство на денешниот вонреден состанок со здружението, по вчерашната сторија на Сител дека скопјанец починал без да има можност за медицински третман поради тоа што дијагнозата не е примарна.
-За жал требаше тоа да излезе на медиуми, да кажеме каква е состојбата за на крај да интервенира министерот, изјави Ирена Коцев од здружението за пулмонална хипертензија.
Од здружението добиле ветување и за додавање на дополнителен лек во програмата за ретки болести што е неопходен за пациент со пулмонална хипертензија. Министерството им ветило и обезбедување на кислородна поддршка за сите на кои им е неопходна.
-Добро е нашите пациенти да добиваат терапија а тие нека ја решаваат работата системски, вели Коцев.
Филипче во изјава за Сител вели дека до ревидирање на позитивната листа ќе реагираат и интервентно доколку има пациент со секундарна пулмонална хипертензија на кој му е неопходна терапија. Вели дека ова било системски проблем што се провлекувал со години.
-Законот за здравствнео осигурување е во собрание, потоа ќе биде формирана комисијата која ќе мора да ја прочешла листата, Има поголерм број на такви пациенти со секундарна а примарно им е срцева или вродена маана, вели Венко Филипче, министер за здравство.
Според евиденцијата на министерството за здравство во земјата има 6-мина пациенти со ретката болест пулмонална хипертензија кои имаат проблеми со дишењето и слаба функција на срцевиот мускул. Има уште стотина кај кои болеста е секундарна и не ги следувала терапија, па приватно одвојувале и по 500тини евра месечно за неопходните лекови.